ᱪᱮᱛᱟᱱᱨᱮ ᱡᱷᱚᱛᱚ ᱯᱟᱹᱨᱥᱤ ᱧᱮᱞ ᱢᱮ? ᱟᱞᱮ ᱜᱞᱳᱵᱟᱞ ᱵᱷᱳᱭᱮᱥᱮᱥ ᱨᱮᱱᱟᱜ ᱠᱷᱚᱵᱚᱨ ᱞᱮ ᱛᱚᱨᱡᱚᱢᱟ ᱮᱫᱟ ᱡᱮᱢᱚᱱ ᱥᱟᱱᱟᱢ ᱦᱚᱲ ᱴᱷᱮᱫ ᱡᱮᱜᱮᱛ ᱨᱮᱱᱟᱜ ᱱᱟᱜᱟᱨᱤᱭᱟᱹ ᱢᱤᱰᱤᱭᱟ ᱥᱮᱴᱮᱨ ᱫᱟᱲᱮ ᱭᱟᱜᱼᱟ

ᱥᱤᱧᱚᱛ ᱨᱮᱱᱟᱜ ᱳᱰᱤᱥᱟ ᱯᱚᱱᱚᱛ ᱒᱑ ᱜᱚᱴᱟᱝ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱛᱮ ᱚᱱᱞᱟᱭᱤᱱ ᱰᱤᱠᱥᱱᱟᱨᱤ ᱯᱟᱨᱥᱟᱞ ᱠᱮᱫᱟᱭ

ᱳᱰᱤᱥᱟ ᱵᱷᱚᱨᱪᱩᱣᱟᱞ ᱮᱠᱟᱰᱮᱢᱤ ᱣᱮᱵᱥᱟᱭᱤᱴ ᱨᱮᱱᱟᱜ ᱥᱠᱨᱤᱱ ᱪᱤᱛᱟᱹᱨ

᱒᱐᱑᱘ ᱨᱮ ᱥᱤᱧᱚᱛ ᱫᱤᱥᱚᱢ ᱳᱰᱤᱥᱟ ᱯᱚᱱᱚᱛ ᱨᱤᱱᱤᱡ ᱥᱚᱨᱠᱟᱨ ᱒᱑ ᱜᱚᱴᱟᱝ ᱟᱹᱫᱤᱵᱟᱹᱥᱤ ᱯᱟᱹᱨᱥᱤᱛᱮ ᱰᱤᱠᱥᱱᱟᱨᱤ ᱯᱟᱨᱥᱟᱞ ᱞᱮᱫᱟᱭ ᱾ᱱᱚᱣᱟ ᱰᱤᱠᱥᱱᱟᱨᱤ ᱠᱚ ᱚᱱᱟ ᱯᱟᱹᱨᱥᱤᱨᱤᱱ ᱨᱚᱲᱮᱫ ᱜᱩᱴ ᱠᱚ ᱥᱟᱶ ᱡᱚᱯᱲᱟᱣ ᱠᱟᱛᱮᱫ ᱚᱞ ᱤᱛᱩᱱ ᱟᱥᱲᱟ ᱨᱮ ᱥᱟᱸᱜᱮ ᱯᱟᱹᱨᱥᱤᱛᱮ ᱯᱟᱲᱦᱟᱣ ᱞᱟᱹᱜᱤᱫ ᱥᱟᱯᱲᱟᱣ ᱞᱮᱱᱟ ᱾ ᱥᱚᱨᱠᱟᱨ ᱛᱩᱞᱩᱡ ᱛᱮ ᱪᱟᱹᱞᱩ ᱟᱠᱟᱱ ᱚᱱᱞᱟᱭᱤᱱ ᱥᱤᱠᱱᱟᱹᱛ ᱯᱳᱨᱴᱟᱞ ᱨᱮ ᱯᱮ ᱯᱟᱹᱨᱥᱤ ᱨᱮᱱᱟᱜ ᱰᱤᱠᱥᱱᱟᱨᱤ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱠᱷᱚᱱ ᱤᱸᱞᱤᱥ ᱟᱨ ᱩᱰᱤᱭᱟᱹ (ᱳᱰᱤᱥᱟ ᱨᱮᱱᱟᱜ ᱟᱹᱢᱟᱹᱞᱤ ᱯᱟᱹᱨᱥᱤ)ᱛᱮ ᱚᱜᱚᱥᱴ ᱒᱐᱑᱙ ᱨᱮ ᱫᱤᱥᱩᱣᱟᱹ ᱠᱚ ᱞᱟᱹᱜᱤᱫ ᱥᱚᱫᱚᱨ ᱮᱱᱟ ᱾

᱑᱗ ᱚᱠᱴᱚᱵᱚᱨ ᱦᱤᱞᱚᱜ ᱡᱚᱛᱚ ᱰᱤᱠᱥᱱᱟᱨᱤ  ᱳᱰᱤᱥᱟ ᱵᱷᱚᱨᱪᱩᱣᱟᱹᱞ ᱮᱠᱟᱰᱮᱢᱤ ᱨᱮᱭᱟᱞ ᱚᱱᱞᱟᱭᱤᱱ ᱥᱤᱠᱷᱱᱟᱹᱛ ᱯᱳᱨᱴᱟᱞ ᱨᱮ  ᱠᱨᱤᱭᱮᱴᱤᱵᱷ ᱠᱳᱢᱳᱱᱥ ᱟᱴᱨᱤᱵᱩᱥᱚᱱ ᱔ᱹ᱐ ᱦᱚᱛᱮᱛᱮ ᱟᱨ ᱫᱚᱦᱲᱟ ᱞᱟᱭᱥᱮᱱᱥ ᱨᱩᱣᱟᱹᱲ ᱮᱱᱟ ᱾

ᱱᱚᱣᱟ ᱠᱟᱹᱢᱤᱦᱚᱨᱟ ᱨᱮ ᱠᱨᱤᱭᱮᱴᱤᱵ ᱠᱚᱢᱚᱱᱥ ᱨᱤᱱᱤᱡ ᱣᱤᱠᱤᱯᱤᱰᱤᱭᱟ ᱠᱟᱹᱢᱤᱭᱟᱹ , ᱩᱰᱤᱭᱟᱹ ᱣᱤᱠᱤᱯᱤᱰᱤᱭᱟᱹ ᱵᱮᱵᱷᱟᱨᱤᱭᱟᱹ ᱜᱟᱫᱮᱞ ᱜᱩᱴ ᱨᱤᱱᱤᱡ ᱮᱱᱮᱢᱤᱭᱟ ᱥᱚᱭᱞᱮᱥ ᱯᱚᱴᱱᱟᱭᱮᱠ ᱥᱚᱨᱠᱟᱨ ᱥᱟᱞᱟᱜ ᱱᱚᱣᱟ ᱠᱟᱹᱢᱤ ᱦᱚᱨᱟ ᱨᱮ ᱟᱹᱰᱤᱜᱟᱱ ᱮᱱᱮᱢ ᱛᱟᱭ ᱢᱮᱱᱟᱜᱼᱟ ᱾ ᱯᱚᱴᱱᱟᱭᱮᱠ ᱱᱚᱣᱟ ᱞᱟᱦᱟ ᱨᱮ ᱥᱚᱨᱠᱟᱨ ᱮ ᱪᱟᱹᱞᱩ ᱟᱠᱟᱫ ᱣᱮᱵᱥᱟᱭᱤᱴ ᱟᱨ ᱥᱳᱥᱤᱭᱟᱞ ᱢᱤᱰᱤᱭᱟ ᱮᱠᱟᱶᱴ ᱠᱚᱨᱮᱱᱟᱜ ᱠᱚᱯᱤᱨᱟᱭᱤᱴ ᱠᱨᱤᱭᱮᱴᱤᱵᱷ ᱠᱳᱢᱚᱸᱥ ᱛᱮ ᱩᱪᱟᱹᱲ ᱨᱮ ᱜᱚᱲᱚᱭ ᱮᱢ ᱞᱮᱫ ᱛᱟᱦᱮᱸᱫ ᱾

ᱥᱤᱧᱚᱛ ᱟᱹᱱᱟᱹᱨᱤ ᱨᱮᱱᱟᱜ ᱤᱨᱟᱹᱞ ᱫᱷᱟᱯ

ᱥᱤᱧᱚᱛ ᱟᱹᱱᱟᱹᱨᱤ ᱨᱮᱱᱟᱜ ᱤᱨᱟᱹᱞ ᱫᱷᱟᱯ ᱨᱮ  ᱒᱒ ᱜᱚᱴᱟᱝ ᱥᱤᱧᱚᱛ ᱯᱟᱹᱨᱥᱤ ᱨᱮᱱᱟᱜ ᱴᱷᱟᱶ ᱢᱮᱱᱟᱜᱼᱟ , ᱚᱱᱟ ᱯᱟᱹᱨᱥᱤ ᱛᱮ ᱥᱟᱥᱚᱱ, ᱥᱤᱠᱷᱱᱟᱹᱛ ᱟᱨ ᱞᱟᱠᱪᱟᱨ ᱞᱟᱦᱟᱱᱛᱤ ᱨᱮᱱᱟᱜ ᱠᱟᱹᱢᱤ ᱦᱚᱨᱟ ᱪᱟᱹᱞᱩᱜᱼᱟ ᱾ ᱱᱚᱣᱟ ᱠᱚ ᱯᱟᱹᱨᱥᱤ ᱛᱮ ᱯᱚᱵᱞᱤᱠ ᱥᱚᱨᱵᱷᱤᱥ ᱠᱚᱢᱤᱥᱚᱱ ᱵᱤᱱᱤᱰ ᱦᱚᱸ ᱦᱩᱭᱩᱜᱼᱟ ᱢᱮᱱᱛᱮ ᱵᱮᱵᱚᱥᱛᱟ ᱢᱮᱱᱟᱜᱼᱟ ᱾ ᱱᱚᱣᱟ ᱫᱷᱟᱯ ᱨᱮ ᱥᱮᱞᱮᱫ ᱟᱠᱟᱱ ᱯᱟᱹᱨᱥᱤ ᱠᱚᱫᱚ ᱦᱩᱭᱩᱜ ᱠᱟᱱᱟ ᱟᱥᱟᱢᱤ, ᱵᱮᱸᱜᱚᱞᱤ, ᱵᱳᱰᱳ, ᱰᱳᱜᱨᱤ, ᱜᱩᱡᱟᱨᱟᱴᱤ, ᱦᱤᱱᱫᱤ, ᱠᱚᱱᱱᱚᱰᱚ, ᱠᱟᱥᱢᱤᱨᱤ, ᱠᱚᱱᱠᱟᱱᱤ, ᱢᱟᱭᱛᱷᱤᱞᱤ, ᱢᱟᱞᱟᱭᱟᱞᱟᱢ, ᱢᱟᱨᱟᱴᱷᱤ, ᱱᱮᱯᱟᱞᱤ, ᱳᱰᱤᱭᱟ, ᱯᱚᱱᱡᱟᱵᱤ, ᱥᱟᱱᱥᱠᱨᱤᱛ, ᱥᱟᱱᱛᱟᱲᱤ, ᱥᱤᱱᱫᱷᱤ, ᱛᱟᱢᱤᱞ, ᱛᱮᱞᱩᱜᱩ ᱟᱨ ᱩᱨᱫᱩ ᱾ ᱱᱚᱣᱟ ᱛᱟᱹᱞᱠᱟᱹ ᱨᱮ ᱢᱮᱱᱟᱜ ᱯᱟᱹᱨᱥᱤ ᱠᱚᱫᱚ ᱯᱚᱱᱚᱛ ᱛᱷᱚᱠ ᱨᱮᱦᱚᱸ ᱢᱟᱱᱚᱛ  ᱠᱚ ᱧᱟᱢᱼᱟ ᱥᱟᱶ ᱥᱟᱥᱚᱱ ᱟᱨ ᱚᱞ ᱯᱟᱲᱦᱟᱣ ᱨᱮᱱᱟᱜ ᱫᱟᱣ ᱠᱚ ᱧᱟᱢᱼᱟ ᱾ ᱱᱤᱛᱚᱜ ᱟᱨ ᱦᱚᱸ ᱓᱘ ᱜᱚᱴᱟᱝ ᱯᱟᱹᱨᱥᱤ ᱤᱨᱟᱹᱞ ᱫᱷᱟᱯ ᱨᱮ ᱴᱷᱟᱶ ᱨᱮ ᱧᱟᱢ ᱞᱟᱹᱜᱤᱫ ᱛᱟᱹᱜᱤ ᱨᱮ ᱢᱮᱱᱟᱜ ᱠᱚᱣᱟ ᱾

ᱱᱚᱸᱠᱟ ᱵᱟᱝᱼᱟ ᱡᱮ ᱳᱰᱤᱥᱟ ᱥᱚᱨᱠᱟᱨ ᱯᱩᱭᱞᱩ ᱫᱷᱟᱣ ᱳᱰᱤᱥᱟ ᱥᱚᱨᱠᱟᱨ ᱟᱡᱟᱜ ᱚᱱᱞᱟᱭᱤᱱ ᱥᱚᱢᱵᱷᱚᱲ ᱠᱨᱤᱭᱮᱴᱤᱵᱷ ᱠᱳᱢᱚᱱᱥ ᱯᱷᱨᱤ ᱞᱟᱥᱮᱱᱥ ᱨᱮ ᱦᱟᱹᱴᱧ ᱟᱠᱟᱫᱟᱭ, ᱱᱚᱣᱟ ᱞᱟᱦᱟ ᱨᱮ ᱒᱐᱑᱗ ᱡᱚᱦᱚᱜ ᱦᱚᱸ  ᱥᱤᱧᱚᱛ ᱨᱮᱱᱟᱜ ᱯᱩᱭᱞᱩ ᱯᱚᱱᱚᱛ ᱞᱮᱠᱟᱛᱮ ᱠᱨᱤᱭᱮᱴᱤᱵᱷ ᱠᱳᱢᱚᱱᱥ ᱯᱷᱨᱤ ᱞᱟᱥᱮᱱᱥ ᱮᱢ ᱠᱟᱛᱮᱫ ᱥᱤᱨᱟᱹ ᱵᱮᱣᱨᱟ ᱨᱮ ᱛᱟᱦᱮᱸ ᱠᱟᱱᱟᱭ᱾ ᱱᱚᱣᱟ ᱯᱷᱨᱤ ᱞᱟᱭᱥᱮᱱᱥ ᱵᱤᱫᱟᱹᱞ ᱱᱤᱛᱚᱜ ᱥᱚᱨᱠᱟᱨᱼᱟ ᱚᱱᱞᱟᱭᱤᱱ ᱥᱚᱢᱵᱷᱚᱲ  ᱣᱤᱠᱤ ᱢᱤᱰᱤᱭᱟ ᱠᱚᱢᱚᱱᱥ (ᱢᱚᱞᱴᱤᱢᱤᱰᱤᱭᱟ ᱞᱟᱭᱵᱨᱮᱨᱤ) ,ᱣᱤᱠᱤᱥᱳᱨᱥ (ᱚᱱᱞᱭᱤᱱ ᱯᱷᱨᱤ  ᱞᱟᱭᱵᱨᱮᱨᱤ) ᱟᱨ ᱣᱤᱠᱤᱥᱱᱟᱨᱤ (ᱚᱱᱞᱟᱭᱤᱱ ᱯᱷᱨᱤ ᱰᱤᱠᱥᱱᱟᱨᱤ) ᱞᱮᱠᱟᱱ ᱯᱷᱩᱨᱜᱟᱹᱞ ᱪᱷᱟᱢᱰᱟ ᱨᱮ ᱵᱮᱵᱷᱟᱨ ᱜᱟᱱᱚᱜᱼᱟ ᱾ᱯᱷᱨᱤ ᱞᱟᱭᱥᱮᱱᱥ ᱫᱟᱣ ᱧᱟᱢ ᱮᱱ ᱠᱷᱟᱹᱛᱤᱨ ᱩᱰᱤᱭᱟᱹ ᱵᱮᱵᱷᱟᱨᱤᱭᱟᱹ ᱜᱟᱫᱮᱞ ᱜᱩᱴ ᱨᱤᱱᱤᱡ ᱜᱭᱟᱱᱚᱨᱚᱱᱡᱚᱱ ᱥᱟᱦᱩ ᱢᱤᱫ ᱥᱟᱯᱟᱵ ᱮ ᱡᱩᱛ ᱠᱮᱫᱼᱟ ᱡᱟᱦᱟᱸ ᱛᱩᱞᱩᱡ ᱥᱳᱥᱤᱭᱟᱞ ᱢᱤᱰᱤᱭᱟ ᱨᱮ ᱨᱤᱞᱟᱭᱥᱮᱱᱥ ᱟᱠᱟᱱ ᱪᱤᱛᱟᱹᱨ ᱠᱚ ᱟᱞᱜᱟᱛᱮ ᱣᱤᱠᱤᱢᱤᱰᱤᱭᱟ ᱠᱳᱢᱚᱱᱥ ᱛᱮ ᱩᱪᱟᱹᱲ ᱜᱟᱱᱚᱜᱼᱟ  ᱡᱮᱢᱚᱱ ᱣᱤᱠᱤᱯᱤᱰᱤᱭᱟ ᱨᱮ ᱚᱱᱟ ᱠᱚ ᱵᱮᱵᱷᱟᱨ ᱜᱟᱱᱚᱜᱼᱟ ᱾

ᱱᱚᱣᱟ ᱵᱟᱵᱚᱫᱽ ᱛᱮ ᱨᱟᱭᱡᱤᱝ ᱵᱷᱳᱭᱮᱥ ᱨᱤᱱᱤᱡ ᱥᱩᱵᱷᱟᱥᱤᱥ ᱯᱟᱬᱤᱜᱨᱟᱦᱤ ᱨᱚᱱᱡᱚᱱᱟ ᱪᱳᱯᱨᱟ ᱥᱟᱞᱟᱜ ᱮ ᱨᱚᱯᱚᱲ ᱞᱮᱱᱟ , ᱨᱚᱱᱡᱚᱱᱟ ᱪᱳᱯᱨᱟ ᱫᱚ ᱳᱫᱤᱥᱟ ᱥᱚᱨᱠᱟᱨ ᱨᱤᱱᱤᱡ ᱛᱟᱹᱞᱠᱟᱹ ᱟᱠᱟᱱ ᱡᱟᱹᱛᱤ ᱟᱨ ᱟᱹᱫᱤᱵᱟᱹᱥᱤ ᱞᱟᱦᱟᱱᱛᱤ, ᱞᱮᱠᱷᱟᱥᱤᱫ ᱟᱨ ᱛᱟᱭᱱᱚᱢ ᱨᱮ ᱢᱮᱱᱟᱜ ᱠᱚ ᱞᱟᱹᱜᱤᱫ ᱵᱷᱟᱹᱞᱟᱭ ᱵᱤᱵᱷᱟᱜ ᱨᱤᱱᱤᱡ ᱢᱩᱲ ᱦᱚᱲ ᱠᱟᱱᱟᱭ ᱾

ᱪᱳᱯᱨᱟ ᱜᱚᱢᱠᱮᱭᱟᱱᱤ ᱛᱤᱠᱤᱱᱟ ᱢᱮᱱ ᱞᱮᱠᱟᱛᱮ  ᱥᱟᱸᱜᱮ ᱯᱟᱹᱨᱥᱤ ᱛᱮ ᱥᱮᱪᱮᱫᱚᱜ ᱨᱮᱱᱟᱜ ᱠᱟᱹᱢᱤᱦᱚᱨᱟ ᱟᱹᱫᱤᱵᱟᱹᱥᱤ ᱰᱤᱠᱥᱱᱟᱨᱤ ᱵᱟᱨ ᱯᱟᱹᱨᱥᱤᱛᱮ ᱵᱮᱱᱟᱣ ᱩᱛᱱᱟᱹᱣ  ᱵᱚᱲᱦᱮ ᱦᱚᱨ ᱮ ᱩᱫᱩᱜ ᱤᱫᱤ ᱠᱮᱫᱟ ᱾ ᱳᱰᱤᱥᱟ ᱯᱚᱱᱚᱛ ᱨᱮ ᱒᱑ ᱜᱚᱴᱟᱝ ᱵᱷᱮᱜᱟᱨ ᱵᱷᱮᱜᱟᱨ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱛᱮ ᱦᱚᱲ ᱠᱚ ᱨᱚᱲᱼᱟ ᱟᱨ ᱯᱷᱮᱰᱟᱛ ᱠᱟᱹᱢᱤᱭᱟᱱ ᱴᱷᱟᱶ ᱨᱮ ᱯᱮ ᱯᱟᱹᱨᱥᱤ ᱨᱮᱱᱟᱜ ᱯᱟᱹᱨᱩᱠᱷᱤᱭᱟᱹ ᱟᱹᱰᱤ ᱜᱮ ᱞᱟᱹᱠᱛᱤᱜᱮᱭᱟ , ᱥᱮᱪᱮᱫᱚᱜ ᱨᱮᱱᱟᱜ ᱫᱟᱣ ᱵᱟᱝ ᱛᱟᱦᱮᱱ ᱠᱷᱟᱹᱛᱤᱨ ᱟᱠᱚ ᱟᱹᱰᱤᱜᱮ ᱮᱴᱠᱮᱴᱚᱬᱮ ᱠᱚ ᱥᱟᱢᱟᱝᱼᱟ ᱾ ᱱᱚᱣᱟ ᱠᱟᱹᱢᱤ ᱥᱟᱹᱛ ᱨᱮ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱟᱨ ᱞᱟᱠᱪᱟᱨ ᱮᱠᱟᱰᱮᱢᱤ Academy of Tribal Languages and Culture (ATLC) ᱟᱨ ᱛᱟᱹᱞᱠᱟᱹ ᱟᱠᱟᱱ ᱡᱟᱹᱛᱤ ᱟᱨ ᱛᱟᱹᱞᱠᱟᱹ ᱟᱠᱟᱱ ᱟᱹᱫᱤᱵᱟᱹᱥᱤ ᱠᱚᱸᱫᱨᱚᱸᱫᱽ ᱟᱨ ᱥᱮᱪᱮᱫ ᱛᱮᱸᱜᱟᱲ Scheduled Castes and Scheduled Tribes Research and Training Institute (SCSTRTI)  ᱟᱨ ᱟᱥᱚᱠᱟᱭ ᱞᱟᱦᱟᱱᱛᱤ ᱵᱟᱹᱭᱥᱤ Special Development Councils (SDC) ᱥᱟᱶ ᱥᱟᱱᱟᱢ ᱥᱚᱨᱠᱟᱨ ᱨᱮᱱᱟᱜ ᱜᱚᱯᱚᱲᱚ ᱢᱮᱱᱟᱜᱼᱟ ᱾ ᱳᱰᱤᱥᱟ ᱨᱮ ᱵᱟᱦᱨᱮ ᱠᱷᱚᱱ ᱫᱟᱲᱟᱱ ᱠᱚ ᱦᱟᱹᱡᱩᱜ ᱠᱟᱱ ᱦᱚᱲ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱯᱟᱹᱨᱥᱤ ᱟᱨ ᱞᱟᱠᱪᱟᱨ ᱤᱫᱤᱭᱟᱛᱮ ᱵᱟᱰᱟᱭ ᱞᱟᱹᱜᱤᱫ ᱳᱰᱤᱥᱟ ᱨᱟᱡᱽᱜᱟᱲ ᱵᱷᱩᱵᱚᱱᱮᱥᱣᱚᱨ ᱨᱮ ᱢᱮᱱᱟᱜ   ᱢᱭᱩᱡᱤᱭᱚᱢ ᱚᱯᱷ ᱴᱨᱟᱭᱵᱟᱞ ᱟᱨᱴ ᱮᱱᱰ ᱠᱨᱟᱯᱷᱴ ᱢᱤᱫᱛᱟᱝ ᱟᱹᱰᱤᱜᱟᱱ ᱥᱚᱢᱵᱷᱚᱲᱟᱱ ᱴᱷᱟᱶ ᱠᱟᱱᱟ ᱾

ᱨᱟᱭᱡᱤᱝ ᱵᱷᱳᱭᱮᱥ (RV): ᱟᱹᱰᱤᱜᱟᱱ ᱯᱟᱹᱨᱥᱤ ᱱᱤᱛ ᱫᱷᱟᱹᱵᱤᱡ ᱵᱟᱝ ᱞᱟᱪᱷᱟᱥᱟᱹᱣᱛᱤ ᱟᱠᱟᱱᱟ ᱾ ᱟᱹᱲᱟᱹ ᱠᱚ ᱥᱮᱸᱫᱨᱟ ᱟᱨ ᱥᱟᱢᱴᱟᱣ ᱢᱤᱫ ᱨᱮ ᱨᱚᱲ ᱮᱫ ᱜᱩᱴ ᱠᱚ ᱥᱟᱶ ᱪᱮᱫ ᱞᱮᱠᱟ ᱜᱚᱯᱚᱲᱚ ᱦᱩᱭ ᱮᱱᱟ ?ᱱᱚᱣᱟ ᱠᱟᱹᱢᱤ ᱦᱚᱨᱟ ᱨᱮ ᱱᱤᱛᱚᱜ ᱢᱮᱱᱟᱜ ᱟᱠᱟᱫ ᱰᱤᱠᱥᱱᱟᱨᱤ ᱪᱮᱫ ᱞᱮᱠᱟ ᱜᱚᱲᱚᱭ  ᱮᱢ ᱮᱫᱟ ?

ᱨᱚᱸᱡᱚᱱᱟ ᱪᱳᱯᱨᱟ (RC): ᱦᱚᱭ ᱱᱚᱣᱟ ᱫᱚ ᱥᱟᱹᱨᱤ ᱠᱟᱛᱷᱟ ᱠᱟᱱᱟ ᱡᱮ ᱳᱰᱤᱥᱟ ᱨᱮ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱠᱚᱫᱚ ᱵᱷᱟᱹᱜᱤ ᱥᱟᱹᱦᱤᱧ ᱵᱟᱝ ᱞᱟᱪᱷᱟᱥᱟᱹᱣᱛᱤ ᱟᱠᱟᱱᱟ, ᱟᱨ ᱡᱟᱦᱟᱸ ᱠᱟᱹᱢᱤ ᱟᱠᱟᱱᱟ ᱟᱹᱰᱤ ᱠᱷᱟᱴᱚ ᱫᱷᱟᱨᱟᱜᱮ ᱾ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱮᱠᱷᱮᱱ ᱨᱚᱲ ᱞᱮᱠᱟ ᱛᱮᱜᱮ ᱢᱮᱱᱟᱜᱼᱟ , ᱟᱨ ᱚᱱᱟ ᱦᱚᱸ ᱟᱹᱰᱤ ᱞᱮᱠᱟ ᱛᱮ ᱢᱮᱱᱟᱜᱼᱟ᱾ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱠᱚ ᱟᱹᱰᱤ ᱞᱟᱠᱟᱱᱟᱜ ᱢᱮᱱᱟᱜ ᱨᱮᱦᱚᱸ ᱢᱤ ᱢᱤᱫ ᱛᱟᱞᱢᱟ ᱴᱷᱟᱶ ᱨᱮᱫᱚ ᱱᱟᱥᱮᱱᱟᱜ ᱢᱮᱥᱟ ᱥᱟᱶ ᱛᱮ ᱴᱷᱟᱣᱠᱟᱹ ᱯᱟᱹᱨᱥᱤ ᱛᱮᱠᱚ ᱨᱚᱯᱚᱲᱼᱟ ᱾  ᱵᱟᱨ ᱯᱟᱹᱨᱥᱤ ᱨᱮᱱᱟᱜ ᱰᱤᱠᱥᱱᱟᱨᱤ ᱟᱨ ᱯᱮ ᱯᱟᱹᱨᱥᱤ ᱨᱮᱱᱟᱜ ᱞᱟᱹᱢᱤ ᱠᱟᱹᱢᱤ ᱥᱟᱯᱲᱟᱣ ᱡᱚᱦᱚᱜ , ᱯᱟᱹᱨᱩᱠᱷᱤᱭᱟᱹ ᱜᱚᱢᱠᱮ ᱠᱚ ᱛᱟᱱᱟᱞᱟ ᱴᱷᱟᱶ ᱠᱷᱚᱱ ᱱᱮᱣᱛᱟ ᱦᱩᱭ ᱞᱮᱱᱟ ᱟᱨ ᱥᱟᱶ ᱛᱮ  ᱟᱠᱚ ᱠᱟᱹᱢᱤ ᱨᱮᱱᱟᱜ ᱚᱠᱛᱚ ᱡᱮᱢᱚᱱ ᱟᱵᱝ ᱢᱤᱫᱴᱟᱝ ᱪᱮᱛᱟᱱ ᱨᱮ ᱟᱨ ᱢᱤᱫᱴᱟᱝ ᱟᱞᱚ ᱞᱟᱫᱮᱜ ᱢᱟ ᱚᱱᱠᱟ ᱥᱩᱥᱟᱹᱨ ᱞᱮᱱᱟ ᱾ ᱡᱮ ᱡᱟᱦᱟᱨ ᱯᱟᱹᱨᱥᱤ ᱨᱮᱱᱟᱜ ᱛᱟᱞᱢᱟ ᱴᱷᱟᱶ ᱨᱮ ᱠᱟᱹᱢᱤᱥᱟᱲᱟ ᱡᱩᱛ ᱟᱛᱮᱫ ᱯᱟᱹᱨᱩᱠᱷᱤᱭᱟᱹ ᱠᱚ ᱵᱟᱪᱷᱚᱱ ᱞᱮᱱᱟ ᱾

RV:ᱛᱤᱱᱟᱹᱜ ᱜᱟᱱ ᱯᱟᱹᱨᱥᱤ ᱡᱮᱢᱚᱱ ᱵᱳᱱᱰᱟ, ᱘᱐᱐᱐ ᱜᱟᱱ ᱦᱚᱲ ᱛᱮᱜᱮ ᱠᱚ ᱨᱚᱲ ᱮᱫᱟᱠᱚ ᱾ ᱵᱳᱱᱰᱟ ᱜᱩᱴ ᱨᱤᱱ ᱟᱫᱷᱟ ᱦᱚᱲ ᱟᱹᱰᱤ ᱵᱷᱤᱛᱨᱤ ᱟᱹᱛᱩᱨᱮᱠᱚ ᱛᱟᱦᱮᱱ ᱠᱟᱱᱟ ᱾ ᱱᱩᱠᱩ ᱯᱟᱹᱨᱥᱤ ᱨᱤᱱ ᱦᱚᱲ ᱪᱮᱫ ᱞᱮᱠᱟᱨᱮ ᱥᱟᱸᱜᱮ ᱯᱟᱹᱨᱥᱤ ᱛᱮ ᱯᱟᱲᱦᱟᱣ ᱞᱟᱹᱜᱤᱫ ᱮᱢ ᱫᱤᱹᱥᱟᱹ ᱠᱮᱫᱟ ᱟᱨ ᱟᱠ ᱪᱮᱫ ᱞᱮᱠᱟᱨᱮ ᱯᱚᱛᱚᱵ ᱮᱢ ᱥᱮᱴᱮᱨ ᱟᱠᱚᱼᱣᱟ ?

RC: ᱮᱛᱚᱦᱚᱵ ᱨᱮ ᱡᱟᱦᱟᱸ ᱞᱮᱠᱟᱧ ᱢᱮᱱ ᱞᱮᱫᱟ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱛᱮ ᱡᱟᱦᱟᱸ ᱚᱞ ᱠᱚ ᱥᱟᱯᱲᱟᱣ ᱟᱠᱟᱱᱟ ᱚᱱᱟ ᱠᱚᱫᱚ ᱥᱟᱸᱜᱮ ᱯᱟᱹᱨᱥᱤ ᱛᱮ ᱯᱟᱲᱦᱟᱣ ᱠᱮᱴᱮᱡ ᱞᱟᱹᱜᱤᱫ ᱡᱩᱛ ᱟᱠᱟᱱᱟ, ᱚᱱᱠᱟ ᱜᱮ ᱵᱚᱱᱰᱟ ᱯᱟᱹᱨᱥᱤ ᱞᱟᱹᱜᱤᱫ ᱦᱚᱸ ᱾ ᱡᱮᱡᱟᱨ ᱯᱟᱹᱨᱥᱤ ᱨᱤᱱ ᱯᱟᱹᱨᱥᱤ ᱢᱟᱪᱮᱛ ᱡᱟᱦᱟᱸᱭ ᱠᱚ ᱵᱟᱦᱟᱞ ᱟᱠᱟᱱᱟ ᱟᱠᱚ ᱡᱟᱱᱟᱢ ᱯᱟᱹᱨᱥᱤ ᱛᱮᱜᱮ ᱥᱤᱠᱷᱱᱟᱹᱛ ᱠᱚ ᱮᱢᱼᱟ ᱾ ᱱᱚᱣᱟ ᱠᱟᱹᱢᱤ ᱦᱚᱨᱟ ᱨᱮ ᱱᱤᱭᱟᱹ ᱵᱟᱨ ᱯᱟᱹᱨᱥᱤ ᱨᱮᱱᱟᱜ ᱯᱚᱛᱚᱵ (ᱵᱟᱨ ᱯᱟᱹᱨᱥᱤ ᱨᱮᱱᱟᱜ ᱰᱤᱠᱥᱱᱟᱨᱤ ᱟᱨ ᱯᱮ ᱯᱟᱹᱨᱥᱤ ᱯᱟᱹᱨᱩᱠᱷᱚᱜ ᱦᱟᱹᱴᱤᱧ) ᱟᱹᱰᱤᱜᱮ ᱠᱟᱹᱢᱤ ᱨᱮ ᱦᱟᱹᱡᱩᱜᱼᱟ ᱾

ᱱᱚᱣᱟ ᱰᱤᱠᱥᱱᱟᱨᱤ ᱦᱟᱨᱟᱵᱩᱨᱩ ᱠᱟᱹᱢᱤᱦᱚᱨᱟ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱟᱨ ᱞᱟᱠᱪᱟᱨ ᱮᱠᱟᱰᱮᱢᱤ ᱟᱹᱜᱤᱵᱷᱟᱨ ᱮ ᱜᱚᱜ ᱟᱠᱟᱫᱼᱟ ᱾ ᱮᱠᱟᱰᱮᱢᱤ ᱱᱚᱣᱟ ᱠᱚ ᱥᱚᱢᱵᱷᱚᱲ ᱞᱟᱹᱠᱛᱤᱭᱟᱱ ᱟᱹᱢᱟᱹᱞᱤ ᱟᱨ ᱡᱟᱦᱟᱸ ᱨᱮ ᱟᱹᱰᱤᱜᱟᱱ ᱞᱟᱦᱟᱱᱛᱤ ᱠᱟᱹᱢᱤ ᱪᱟᱹᱞᱩ ᱟᱠᱟᱱᱟ ᱚᱱᱰᱮ ᱵᱷᱮᱡᱟ ᱦᱩᱭ ᱟᱠᱟᱫᱟᱭ ᱾ ᱥᱟᱶᱛᱮ ᱚᱱᱟ ᱡᱟᱱᱟᱢ ᱯᱟᱹᱨᱥᱤ ᱨᱤᱱ ᱢᱟᱪᱮᱛ ᱟᱨ ᱥᱟᱢᱟᱝ ᱫᱷᱟᱯ ᱨᱮ ᱠᱟᱹᱢᱤ ᱠᱟᱱ e ᱟᱥᱟ (ASHA)ᱚᱸᱜᱚᱱ ᱵᱟᱹᱰᱤ ᱠᱟᱹᱢᱤᱭᱟᱹ ᱠᱚᱴᱷᱮᱫ ᱦᱚᱸ ᱥᱮᱴᱮᱨ ᱟᱠᱟᱱᱟ, ᱡᱟᱦᱟᱸᱭ ᱫᱚ ᱟᱹᱛᱩ ᱫᱤᱥᱚᱢ ᱨᱮ  ᱦᱚᱲᱢᱚ ᱡᱚᱛᱚᱱ, ᱡᱚᱢ ᱧᱩ ᱟᱨ ᱟᱥᱲᱟ ᱪᱟᱞᱟᱜ ᱢᱟᱬᱟᱝ ᱥᱤᱠᱷᱱᱟᱹᱛ ᱨᱮᱱᱟᱜ ᱠᱟᱹᱢᱤ ᱠᱚ ᱛᱩᱞᱟᱹᱣ ᱮᱫᱟ ᱾

ᱚᱱᱚᱞᱤᱭᱟᱹ ᱳᱰᱤᱥᱟ ᱥᱚᱨᱠᱟᱨ ᱨᱤᱱᱤᱡ ᱤᱞᱮᱠᱴᱨᱳᱱᱤᱠᱥ ᱟᱨ ᱤᱱᱯᱷᱚᱨᱢᱮᱥᱚᱱ ᱴᱮᱠᱱᱳᱞᱳᱡᱤ  ᱵᱤᱵᱷᱟᱜ ᱨᱤᱱ ᱥᱩᱛᱨᱮᱛ ᱢᱚᱱᱳᱡᱽ ᱠᱩᱢᱟᱨ ᱢᱤᱥᱨᱚ ᱥᱟᱞᱟᱜ ᱮ ᱨᱚᱯᱚᱲ ᱞᱮᱱᱟᱭ ᱟᱨ ᱟᱠᱚᱣᱟᱜ ᱥᱚᱢᱵᱷᱚᱲ ᱭᱩᱱᱤᱠᱳᱰ ᱛᱮ ᱫᱚᱦᱚ ᱤᱫᱤᱭᱟᱛᱮ ᱦᱩᱫᱤᱥ ᱮ ᱵᱟᱰᱟᱭ ᱞᱮᱫᱟ ᱾ ᱣᱤᱠᱤᱯᱤᱰᱤᱭᱟ ᱦᱤᱥᱟᱹᱵ ᱛᱮ  “ᱭᱩᱱᱤᱠᱳᱰ ᱫᱚ ᱡᱮᱜᱮᱛ ᱚᱞ ᱛᱚᱦᱚᱨ ᱨᱮᱱᱟᱜ ᱢᱤᱫ ᱡᱚᱠᱷᱟ ᱠᱟᱱᱟ ᱡᱟᱦᱟᱸ ᱡᱮᱜᱮᱛ ᱨᱮᱱᱟᱜ ᱵᱟᱹᱲᱛᱤ ᱠᱟᱭ ᱯᱟᱹᱨᱥᱤ ᱠᱳᱰᱤᱝ ᱥᱟᱶ ᱧᱮᱞ ᱥᱟᱢᱴᱟᱣ ᱟᱭ ᱾.” ᱭᱩᱱᱤᱠᱳᱰ ᱧᱟᱢᱚᱜ ᱞᱟᱦᱟᱨᱮ ᱥᱤᱧᱚᱛ ᱞᱮᱠᱟᱱ ᱫᱤᱥᱚᱢ ᱨᱮ  ᱣᱮᱵ ᱨᱮ ᱚᱞ ᱠᱚ ᱯᱟᱱᱛᱮ ᱟᱨ ᱦᱟᱹᱴᱤᱧ ᱟᱹᱰᱤ ᱟᱱᱟᱴ ᱜᱮ ᱛᱟᱦᱮᱸ ᱠᱟᱱᱟ ᱾

RC: ᱡᱟᱦᱟᱸ ᱞᱮᱠᱟᱢ ᱵᱟᱰᱟᱭᱟ ᱰᱤᱠᱥᱱᱟᱨᱤ ᱨᱮᱱᱟᱜ ᱚᱞ ᱠᱚ ᱯᱟᱲᱦᱟᱣ ᱜᱟᱱᱚᱜ ᱠᱟᱱᱟ ᱤᱠᱷᱟᱹᱱ ᱯᱟᱱᱛᱮ ᱨᱮ ᱫᱚ ᱵᱟᱝ ᱧᱟᱢᱚᱜ ᱠᱟᱱᱟ ᱾ ᱚᱱᱟᱠᱚ ᱪᱮᱫ ᱞᱮᱠᱟᱨᱮ ᱭᱩᱱᱤᱠᱳᱰ ᱛᱮ ᱥᱚᱫᱚᱨᱚᱜᱼᱟ ᱡᱮᱢᱚᱱ ᱜᱚᱴᱟᱯᱟᱲᱟ ᱡᱚᱛᱚ ᱚᱯᱚᱨᱮᱴᱤᱝ ᱥᱤᱥᱴᱟᱢ ᱟᱨ ᱥᱟᱯᱟᱵ ᱨᱮ ᱧᱮᱞ ᱧᱟᱢᱚᱜᱼᱟ ᱚᱱᱟ ᱨᱮᱱᱟᱜ ᱪᱮᱫ ᱞᱮᱠᱟ ᱥᱟᱯᱲᱟᱣ ᱪᱟᱹᱞᱩ ᱟᱠᱟᱱᱟ ?

ᱢᱚᱱᱳᱡ ᱠᱩᱢᱟᱨ ᱢᱤᱥᱨᱚ: ᱟᱞᱮ ᱳᱫᱤᱥᱟ ᱥᱚᱨᱠᱟᱨ ᱨᱮᱱᱟᱜ ᱣᱮᱵᱥᱟᱭᱤᱴ ᱨᱮ ᱢᱮᱱᱟᱜ ᱥᱚᱢᱵᱷᱚᱲ ᱡᱚᱛᱚ ᱭᱩᱱᱤᱠᱳᱰ ᱛᱮ ᱟᱹᱜᱩ ᱞᱟᱹᱜᱤᱫ ᱢᱚᱱᱮ ᱠᱮᱴᱮᱡ ᱟᱠᱟᱫᱼᱟ , ᱡᱮᱢᱚᱱ ᱯᱚᱱᱚᱛ ᱨᱤᱱ ᱥᱟᱱᱟᱢ ᱱᱟᱜᱟᱨᱤᱭᱟᱹ ᱡᱟᱦᱟᱸᱨᱮᱜᱮ ᱛᱟᱦᱮᱱᱟᱭ ᱣᱮᱵ ᱨᱮ ᱯᱟᱸᱡᱟ ᱞᱮᱠᱷᱟᱱ ᱮ ᱧᱟᱢ ᱫᱟᱲᱮᱭᱟᱜᱼᱟ ᱾ᱱᱤᱛᱚᱜ ᱫᱚ ᱟᱞᱮ ᱚᱞ ᱟᱨ ᱳᱰᱤᱭᱟ ᱯᱷᱚᱱᱴ ᱵᱷᱮᱜᱟᱨ ᱵᱷᱮᱜᱟᱨ ᱥᱟᱯᱟᱵ ᱨᱮ ᱯᱟᱲᱦᱟᱣ ᱜᱟᱱᱚᱜ ᱢᱟ ᱚᱱᱟ ᱨᱮᱱᱟᱜ ᱰᱷᱟᱸᱪᱟ ᱦᱟᱨᱟ ᱞᱟᱹᱜᱤᱫ ᱞᱮ ᱪᱷᱩᱴᱟᱹᱣ ᱟᱠᱟᱱᱟ ᱾ ᱦᱟᱹᱡᱩᱜ ᱠᱟᱱ ᱫᱤᱱ ᱨᱮ ᱤᱱᱴᱚᱨᱱᱮᱴ ᱨᱮ ᱰᱤᱠᱥᱱᱟᱨᱤ ᱧᱟᱢᱚᱜ ᱞᱟᱹᱜᱤᱫ ᱵᱮᱵᱚᱥᱛᱟ ᱦᱩᱭᱩᱜᱼᱟ ᱾ ᱟᱞᱮ ᱱᱚᱣᱟ ᱠᱚᱨᱮᱱᱟᱜ ᱨᱮᱫ ᱳᱰᱤᱭᱟ ᱣᱤᱠᱤ ᱥᱚᱢᱵᱷᱚᱲ ᱥᱟᱶ ᱞᱮ ᱦᱟᱹᱴᱤᱧ ᱮᱫᱟ ᱡᱮᱢᱚᱱ ᱚᱱᱟ ᱨᱤᱱ ᱠᱟᱹᱢᱤᱭᱟᱹ ᱠᱚ ᱭᱩᱱᱤᱠᱳᱰ ᱛᱮᱠᱚ ᱵᱚᱫᱚᱞ ᱫᱟᱲᱮᱭᱟᱜᱼᱟ  ᱟᱨ ᱟᱵᱚᱣᱟᱜ ᱚᱞ ᱟᱠᱟᱱ ᱠᱤᱥᱟᱬ ᱥᱚᱥᱱᱚᱜ ᱥᱟᱱᱟᱢ ᱦᱚᱲ ᱟᱡ ᱛᱮ ᱣᱮᱵ ᱨᱮᱠᱚ ᱯᱟᱸᱡᱟ ᱞᱮᱠᱷᱟᱱ ᱠᱚ ᱧᱟᱢᱼᱟ ᱾

ᱡᱟᱦᱟᱸ ᱯᱟᱹᱨᱥᱤ ᱠᱚᱨᱮᱱᱟᱜ ᱪᱤᱠᱤ ᱵᱟᱹᱱᱩ ᱟᱹᱱᱤᱡ ᱩᱱᱠᱩ ᱠᱚ ᱞᱟᱹᱜᱤᱫ ᱱᱚᱣᱟ ᱰᱤᱠᱥᱱᱟᱨᱤ ᱯᱟᱹᱥᱤ ᱥᱟᱬᱮᱥᱤᱭᱟᱹ ᱟᱨ ᱯᱟᱹᱨᱥᱤ ᱠᱚᱸᱫᱨᱚᱸᱫᱤᱭᱟᱹ ᱠᱚ ᱞᱟᱹᱜᱤᱫ ᱟᱹᱰᱤᱜᱮ ᱠᱟᱹᱢᱤᱨᱮ ᱦᱟᱹᱡᱩᱜᱼᱟ ᱿ ᱢᱚᱞᱴᱤᱢᱤᱰᱤᱭᱟ ᱥᱟᱛᱟᱢ ᱞᱟᱦᱟ ᱞᱟᱹᱜᱤᱫ ᱦᱚᱸ ᱱᱣᱟ ᱱᱟᱯᱟᱭ ᱠᱟᱹᱢᱤᱨᱮ ᱦᱟᱹᱡᱩᱜᱼᱟ ᱾ ᱱᱟᱣᱟ ᱡᱩᱣᱟᱹᱱ ᱯᱤᱲᱤᱦᱤ ᱱᱚᱣᱟ ᱵᱮᱥ ᱠᱚ ᱵᱮᱵᱷᱟᱨ ᱫᱟᱲᱮᱭᱟᱜᱼᱟ ᱾ᱪᱟᱞᱟᱣᱮᱱ ᱕᱐ ᱥᱮᱨᱢᱟᱨᱮ ᱥᱤᱧᱚᱛ ᱨᱮ ᱒᱒᱐ᱼ᱒᱕᱐ ᱯᱟᱹᱨᱥᱤ ᱜᱚᱡ ᱟᱠᱟᱱᱟ ᱟᱨ ᱱᱤᱛᱚᱜ ᱟᱸᱫᱟᱡ ᱛᱮ ᱗᱘᱐ ᱜᱟᱱ ᱯᱟᱹᱨᱥᱤ ᱥᱟᱨᱮᱡ ᱟᱠᱟᱱᱟ ᱿

Start the conversation

ᱚᱱᱚᱞᱤᱭᱟ, ᱫᱟᱭᱟᱠᱟᱛᱮ ᱵᱚᱞᱚᱱ ᱢᱮ »

Guidelines

  • All comments are reviewed by a moderator. Do not submit your comment more than once or it may be identified as spam.
  • Please treat others with respect. Comments containing hate speech, obscenity, and personal attacks will not be approved.